Poslovne vesti - Makedonija

Нова фабрика за чевли во Кратово

Женски чевли од познати светски брендови ќе се произведуваат во Кратово. Се отвора италијанска фабрика.

Фирмата Кадоро за почеток ќе вработи 100 луѓе, а понатаму се планира бројот да се зголеми на 250. Истата компанија веќе 4 години успешно работи во Крива Паланка. Во тој погон има вработено 500 луѓе.

- За почеток, погонот во Кратово планирано е да биде само шивална. Базата ќе остане во Крива Паланка. Планираме производството кое во моментов го имаме во Романија и Хрватска да го префрлиме во Кратово - вели Отело Монети, сопственик на фирмата Кадоро.

Во фабриката во Крива Паланка фирмата Кадоро, освен за сопствената линија, произведува чевли по нарачка за познати светски имиња. Целокупнтото производство е наменето за извоз во Германија, Белгија, Холандија и уште неколку други европски држави. Чевлите се прават на најсовремени и автоматски машини, а по потреба и рачно.

- Во моментот сме задоволни. Добро работиме во Крива Паланка. Произведуваме за долгогодишни партнери - додава Монети, сопственик на фирмата Кадоро.

Интензивно се работи на подготовка на просторот каде ќе биде сместена фабриката во Кратово. Се планира да почне со работа на почетокот на август. Фирмата Кадоро постои скоро 40 години, а сопственикот Монети со чевларство се занимава од неговата 10-годишна возраст.